Ajaya Kumar Shah दुई वर्षीया छोरी मन्तरा साहको हत्या गरेको आरोपमा गौशला नपा-६ की २५ वर्षीया सागरदेवी साह र सोही ठाउँका २६ वर्षीय बच्चा साहलाई प्रहरीले जेठ २४ गते गिरफ्तार गरेको छ । जिल्ला प्रहरी कार्यालय महोत्तरीले दिएको जानकारी अुनसार सागरदेवीले जेठ २३ गते छोरी मन्तराको हत्या गरी मरहा खोलामा गाडेकी थिइन् । सागरदेवीले छोरी हराएको हल्ला गाउँमा फैलाएर हत्या ढाकछोप गर्ने प्रयास गरेको पनि प्रहरीले जनाएको छ । तर, स्थानीय बासिन्दाले उनीमाथि शङ्का गर्दै प्रहरीलाई खबर गरेपछि प्रहरीले उनलाई गिरफ्तार गरेको जनाएको छ । प्रहरीले अनुसन्धान गर्दै जाँदा सागरदेवीले जेठ २४ गते छोरीको शव गाडेको ठाउँ देखाएपछि उक्त ठाउँबाट उत्खनन् गरी बालिकाको शव फेला पारेको हो । सागरदेवीले छोरी मन्तराको हत्यामा बच्चा साह पनि संलग्न रहेको र सँगै गएर खोलामा शव गाडेको बयान दिएको आधारमा बच्चा साहलाई पनि गिरफ्तार गरिएको जिल्ला प्रहरी कार्यालय महोत्तरीले जनाएको छ । अजयकुमार साह