सर्मी गाविस-३ निवासी नेकपा माओवादी केन्द्र डोल्पाका जिल्ला अध्यक्ष ४७ वर्षीय सितार भनिने मालबहादुर रोकाय असार १८ गते अज्ञात समूहको आक्रमणबाट घाइते भएका छन् । सदरमुकाम दुनै र जुफाल गाविसको सिमानामा अवस्थित रूपगाड खोला नजिकको एक होटलमा बसेर चिया खाइरहेको अवस्थामा अनुहारमा मखुण्डो लगाएका पाँच जनाको सङ्ख्यामा आएको समूहले दाउराले आक्रमण गरेको प्रत्यक्षदर्शी खडकबहादुर बुढाले बताए । टाउकोमा चोट लागेका पीडितको प्राथमिक उपचार जिल्ला अस्पतालमा भयो भने थप उपचारका लागि उनलाई असार १८ गते नै काठमाण्डौ लगिएको छ । उनको थप उपचार वीर अस्पतालमा भइरहेको नेकपा माओवादी केन्द्र डोल्पाले जनाएको छ । जिल्ला प्रहरी कार्यालय डोल्पाका प्रहरी प्रमुख सुमित खड्काले आक्रमणकारीको खोजी भइरहेको र कसले किन आक्रमण गरेको हो सोको बारेमा अनुसन्धान भइरहेको बताए ।