सूर्यविनायक नपा-४ कटुञ्जेकी २३ वर्षीया दीपा कार्कीलाई असार २९ गते घरायसी विवादका कारण हम्मरले हानेर हत्या गरेको आरोपमा २५ वर्षीय पति विजय कार्कीलाई प्रहरीले सोही दिन गिरफ्तार गरेको छ । दिउँसो घरमा कोही नभएको मौका पारेर पत्नीलाई हत्या गरेर भाग्न खोजेको आरोपमा विजयलाई प्रहरीले काठमाडौँको एयरपोर्टबाटै असार २९ गते गिरफ्तार गरेको महानगरीय प्रहरी परिसर भक्तपुरका एसपी किरण बज्राचार्यले जानकारी दिए । प्रहरीले 'मोबाइललाई ट्रयाक गरेर पछ्याउँदै' एयरपोर्टबाट भाग्न खोज्दै गरेका विजयलाई गिरफ्तार गरेको र आरोपितले लगाएको कपडामा रगत लागेकोले हत्या पतिबाटै भएको भन्दै अनुसन्धान सुरु गरिएको एसपी बज्राचार्यले बताए । ह्म्मरले हानेर मृतकको टाउकोमा गम्भीर चोट लागेर मृत्यु भएको पाइएको घट्नास्थल पुगेका महानगरीय प्रहरी वृत्त जगातीका डिएसपी मित्रबन्धु शर्माले बताए । मृतकका सासू, ससुरा तथा दुई र चार वर्षका दुई छोरा थानकोटमा बिहेमा गएको मौका पारेर घरको पहिलो तल्लामा हत्या गरेको पाइएको डिएसपी शर्माले बताए । मृतकको शव पोष्टमार्टमका लागि काठमाडौँको त्रिविवि शिक्षण अस्पताल महाराजगञ्ज पठाइएको पनि शर्माले जानकारी दिए ।