नचिनेका मानिसको समूहले सोमबार बिहान तनहुँमा ट्रकमा आगजनी गरेको छ । मुग्लिनबाट पोखराका लागि छुटेको सिमेन्ट बोकेको ना ४ ख ३९१ नम्बरको ट्रकमा नचिनेका मानिसको समूहले पेट्रोल छर्की आगजनी गरेको जिल्ला प्रहरी कार्यालय तनहुँका डिएसपी सुरेन्द्रबहादुर गुरुङ्गले बताउनुभयो । आगजनीबाट ट्रकको अघिल्लो भाग पूर्ण रुपमा जलेको छ । त्यसैगरी त्यही समूहले चोक्कर बोकेको ना ५ ख ४१३ नम्बरको ट्रकमा तोडफोड गरेको छ । तोडफोडबाट ट्रकको अगाडीको शिशा फुटेको प्रहरीले जनाएको छ । उनीहरुले पृथ्वी राजमार्ग अन्तर्गत तनहुँको बन्दीपुर–५, याम्पामा आगजनी र तोडफोड गरेका हुन् । घटनाको अहिलेसम्म कुनै पनि समूहले जिम्मा लिएको छैन । घटनामा संलग्नको खोजी भइरहेको प्रहरी नायव उपरीक्षक गुरुङ्गले बताउनुभयो ।