गाईले बाली खाएको निहुँमा फुरुम्बु गाविस ३ का छिमेकीबीच आइतवार दिउँसो झगडा हुँदा ६ जना घाइते भएका छन् । स्थानीय स्वास्थ्य चौकीमा उपचार सम्भव नभएपछि उनीहरूलाई जिल्ला अस्पताल पठाइएको छ । जिल्ला अस्पतालमा पनि उपचार सम्भव नभएपछि गम्भीर घाइते उनीहरूलाई आइतबार राति नै एम्बुलेन्सबाट झापाको बी एण्ड बी अस्पताल पुर्‍याइएको हो । खुकुरी हानाहान गरेका उनीहरूको गर्धन, टाउको, हात, कानमा गम्भीर चोट लागेको स्वास्थ्यकर्मीले बताए । प्रहरीका अनुसार पुरानो रिसइबीसमेत भएका ज्ञानबहादुर भट्टराई र नरबहादुर भट्टराई परिवारको गाईले बाली खाएको विषयमा बिबाद भई झडप भएको थियो । ज्ञानबहादुरको गाईले नरबहादुको बारीको अम्रिसो खाएपछि नरबहादुरको परिवारले गाई बाँधेको र त्यसैबाट विवाद सुरु भएको स्थानीयले बताएका छन् ।