स्थानीय तह पुनर्संरचनासम्बन्धी छलफल सप्तरीमा मधेसवादी दलले अवरोध गरेपछि अनिश्चित बनेको छ । स्थानीय तह पुनर्संरचनासम्बन्धी प्रतिवेदन बुझाउने अन्तिम दिन शनिबार जिल्ला विकास समिति सप्तरीको सभाकक्षमा आयोजित छलफल कार्यक्रममा मधेसवादी दलका कार्यकर्ताहरुले नाराबाजी गर्दे माइन्युट च्यातेपछि जिल्लामा पुनर्संरचनासम्बन्धी कार्य अनिश्चित भएको हो । स्थानीय तह पुनर्संरचनासम्बन्धी प्राविधिक समितिका सदस्यसचिव तथा जिविस सप्तरीका योजना अनुगमन तथा प्रशाकीय अधिकृत धिरेन्द्रकसुमार यादवले मधेसवादी दलको अवरोधका कारण कार्यक्रम स्थगित गर्नुपरेको बताए । जिल्लामा क्रियाशील सबै राजनैतिक दलका प्रतिनिधिहरुलाई बोलाएर शनिबार अपरान्ह जिविस सभाकक्षमा पुनर्संरचनाबारेको छलफल सुरु भएपछि मधेसवादी दलका नेताहरुले सिमांकनको टुंगो नलागेसम्म पुनर्संरचना कार्य गर्न नदिने भन्दै निर्णय पुस्तिका च्यातेका थिए । यसअघि पनि सप्तरीमा स्थानीय तह पुनर्संरचनासम्बन्धी छलफलमा मधेसवादी दलका कार्यकर्ताहरुले अवरोध गरेका थिए । कार्यक्रम विथोलेपछि मधेसवादी दलका कार्यकर्ताहरुले जिविस परिसरसहित राजविराज नगर क्षेत्रमा नाराबाजी गर्दे स्थानीय निकाय पुनर्संरचनासम्बन्धी कार्यप्रति विरोध जनाएका थिए । प्राविधिक समितिका सदस्यसचिव यादवका अनुसार पटक पटकको छलफल मधेसवादी दलको अवरोधका कारण हुन नसकेकाले सोही अनुसारको प्रतिवेदन केन्द्रमा पठाइनेछ ।