संयुक्त लोकतान्त्रिक मधेसी मोर्चासहितको संघीय गठबन्धनले चुनाव बिथोल्ने उद्देश्यले बन्द हडतालसहित आन्दोलनको कार्यक्रम घोषणा गरे लगत्तै आइतबार वीरगञ्जको व्यस्त सडकमा ग्यास सिलिण्डरसहितको झोला भेटिएको छ।
घण्टाघरबाट नयाँ बसपार्क जाने लिंक रोडमा अवस्थित मेरी स्टोप सेन्टर अगाडिको सडक छेउमा आइतबार दिउँसो कालो रंगको झोला भित्र ‘सी आर ओआई इ एन’ लेखिएको ग्याँस सिलिण्डर भेटिएको हो।
कालो रंगको झोला भेटिएपछि झोला भित्र बम रहेको आशंकामा उक्त क्षेत्रको जनजीवन त्रसित बनेको हो। प्रहरीले झोला भेटिएको स्थानलाई नियन्त्रणमा लिएर लिंकरोडमा तीन घण्टा यात्रु र सवारी सधानको आवागमनमा रोक लगाएको थियो। शंकास्पद झोला भेटिएपछि केही समयका लागि बजार पसल पूर्णरुपमा बन्द भएका थिए।
नेपाली सेनाको बरखगणबाट आएको सेनाको बम डिस्पोजल टोलीले दिउँसो २ बजे झोलामाथि विस्फोटक पदार्थ राखेर डिस्पोज गर्दा झोला भित्र ‘सी आर ओआई इ एन’ लेखिएको ग्याँस सिलिण्डर भेटिएको पर्साका प्रहरी नायव उपरीक्षक चक्रराज जोशीले बताउनुभयो ।
झोलामा बम नरहेको स्पष्ट पार्दै उहाँले भने ,‘कुनै व्याक्तिले तर्साउनका लागि यस्तो काम गरेको हुन सक्छ।’ प्रहरीले उक्त ग्याँसको बारे अनुसन्धान भइरहेको बताएको छ।