मोरङ जिल्ला अदालतले जिल्लाको केराबारी-६ मा १५ वर्षीया किशोरीमाथि सामुहिक बलात्कार गरेको अभियोगमा तीन जनालाई पुर्पक्षका लागि थुनामा राख्न आदेश दिएको छ । तत्काल प्राप्त प्रमाणका आधारमा थुनामा राखेर घटनाको अनुसन्धान अघि बढाउन जिल्ला न्यायाधीश प्रकाश राउतको इजलासले आदेश दिएको बताइएको छ। अदालतले केरावारी गाउँपालिका ६ का २१ वर्षीय कन्चन तामाङ, २३ वर्षीय राजु तामाङ र २६ वर्षीया कालु भनिने हिमा दोर्जे तामाङलाई थुनामा राख्न आदेश दिएको हो । तीनजना मिलेर गत चैत १९ गते १५ वर्षीया किशोरीलाई जंगलमा लगेर सामुहिक बलात्कार गरेको घटना सार्वजनिक भएपछि घटनामा संलग्नलाई पक्राउ गरेर प्रहरीले जबरजस्ती करणी सम्बन्धी मुद्धा चलाएको थियो ।