तुलसीपुर उमनपा-४ की ४३ वर्षीया गोमा पुनलाई हत्या गरेको आरोपमा प्रहरीले उनका ५३ वर्षीय पति दिलबहादुर पुनलाई जेठ १५ गते गिरफ्तार गरेको छ । पीडित महिलालाई आरोपितले मादक पदार्थ सेवन गरी जेठ ११ गते मरणासन्न हुनेगरी कुटपिट गरी घाइते बनाएकोमा पीडित महिलाको उपचारका क्रममा कोहलपुर मेडिकल कलेजमा जेठ १४ गते राति मृत्यु भएको थियो । टाउको र शरीरका विभिन्न भागमा गम्भीर चोट लागेकी पुनको मृत्यु भएपछि गोमाकी आमा भिमि रानाले जेठ १५ गते इलाका प्रहरी कार्यालयमा ज्वाँइ विरुद्ध उजुरी दिएकी छन् । मृतकको शवको पोष्टमार्टम जेठ १५ गते राप्ती अञ्चल अस्पताल तुलसीपुरमा गरिएको इलाका प्रहरी कार्यालय तुलसीपुरका डिएसपी लोकनाथ तिम्सिनाले जानकारी दिए ।