नेकपा (एमाले) को राजविराज नगरस्तरीय अगुवा कार्यकर्ता भेलामा प्रवेश गरी राजपाका नेता, कार्यकर्ताहरूले जेठ २८ गते तोडफोड र आगजनी गरेका छन् ।
राजविराज नपा-३ स्थित साह धर्मशालामा आयोजित एमालेको चुनावी भेलामा प्रवेश गरेका राजपाका कार्यकर्ताहरूले तुल, ब्यानर, झण्डा, कागजपत्रलगायतका निर्वाचन सामग्री जलाउनुका साथै कुर्सी तोडफोड गरेका हुन् ।
एमालेका केन्द्र र जिल्लाका नेताहरू तथा राजविराज नगरपालिकाका उम्मेदवारहरू मन्तव्य राखेर अन्यत्रको कार्यक्रममा बाहिरिइसकेपछि बेला नाराजुलुससहित प्रवेश गरेका राजपाका नेता, कार्यकर्ताहरूले कुर्सी तोडफोड गर्दै झण्डा, व्यानर बाहिर ल्याएर जलाए ।
निर्वाचनको वातावरण बिगार्न खोज्नेहरूप्रति सचेत रहन जनसमुदायलाई र सुरक्षा व्यवस्था बलियो बनाउन स्थानीय प्रशासनलाई आग्रह गर्दै एमाले नगर कमिटिका अध्यक्ष निरञ्जन झाले राजपाको गैरलोकतान्त्रिक कार्यप्रति भर्त्र्सना गरे । उनले घटनाप्रति गम्भीर बन्न र दोषीहरूमाथि आवश्यक कारबाही गर्न सिडिओ कृष्णबहादुर कटवालसँग माग समेत गरे । घटना लगत्तै पुगेको प्रहरी टोलीले झडप हुन र थप क्षति हुनबाट जोगाएको थियो ।