जिल्ला समन्वय समिति डोल्पाका स्थानीय विकास अधिकारी ४८ वर्षीय सागर मिश्रलाई सूचना नदिएको आरोपमा असार २६ गते नेपाल कम्युनिष्ट पार्टीका कार्यकर्ताले कार्यकक्षमा कुटपिट गरेका छन् । पीडित मिश्रलाई मुढकेचुला गाउँपालिका-१ का नेपाल कम्युनिष्ट पार्टीका कार्यकर्ता ३५ वर्षीय अङ्क बोहरा र सोही ठाउँका नेपाल कम्युनिष्ट पार्टीका कार्यकर्ता ३८ वर्षीय लालबहादुर बोहराले कुटपिट गरेको स्थानीय विकास अधिकारी मिश्रले बताए । पीडित मिश्रको टाउकोमा चोट लागेको छ । दुई दिन अघि नेपाल कम्युनिष्ट पार्टीका कार्यकर्ताले यस आर्थिक वर्षमा कति खर्च भयो भन्ने विषयमा सूचनाको माग गरेकोमा स्थानीय विकास अधिकारीले सूचना नदिएपछि कुटपिट गरेको घटनामा संलग्न लालबहादुर बोहराले बताए । घटनामा संलग्न नेपाल कम्युनिष्ट पार्टीका दुवै जना कार्यकर्तालाई असार २६ गते दुनै बजारबाट गिरफ्तार गरेको जिल्ला प्रहरी कार्यालयका डिएसपी सुमित खडकाले बताए । जिल्लामा सुरक्षा सतर्कता अपनाइएको प्रमुख जिल्ला अधिकारी केशवराज आचार्यले बताएका छन् ।