RSS महोत्तरीमा एक महिलामाथि हत्याको प्रयास गरिएको छ । गौशाला नगरपालिका—५ शिवभक्ति खोर टोलीकी एक महिलामाथि गएराति साँढे १२ बजेको समयमा धारिलो हतियार प्रयोग गरी हत्याको प्रयास भएको हो । आफ्नै सन्तानसंगै सुतिरहेको अवस्थामा स्थानीय रीतादेवी गिरीमाथि हत्याको प्रयास गरेको इलाका प्रहरी कार्यालय गौशालाका प्रहरी निरीक्षक शम्भु पोखरेलले बताए । उनले भने, ‘घटनाको कारण खुलेको छैन, हामी अनुसन्धानमै छैाँ । ’ धारिलो हतियार प्रहारबाट रीता गम्भीर घाइते भएकी छिन् । उनको घाँटी, पाँखुरा र पिठ्ठीयुमा गहिरो चोट लागेको स्थानीय दिनेश महतोले जानकारी दिए । गम्भीर घाइते रीताको गौशाला स्थित प्राथमिक स्वास्थ्य उपचार केन्द्रमा प्राथमिक उपचार पश्चात थप उपचारको लागि जनकपुर अञ्चल अस्पताल पठाइएको थियो । जनकपुरमा पनि उपचार सम्भव नभएपछि थप उपचारको लागि धरान रेफर गरिएको छ । घटनाको अनुसन्धान भइरहेको इप्रका गौशालाले जनाएको छ । घटना के कारणले भयो भन्ने कुरा यकिन नभएको प्रहरीले बताएको छ । ८ महिना अघिदेखि रीताका श्रीमान् रामजीवन गिरी वैदेशिक रोजगारीको शिलसिलाका मलेसियामा छन् । रीताका चार सन्तान छन् ।