मदिरा सेवन गरेका प्रहरी जवान राति महिला सुतेको कोठामा पसेपछि स्थानीय आक्रोशित भएका छन् । स्थानीयले कारबाहीको माग गर्दै शनिबार वडा प्रहरी कार्यालयमा धर्ना दिए । प्रहरी जवान पदम साउद मदिरा सेवन गरी शुक्रबार राति १२ बजे महिला सुतिरहेको कोठामा पसेका थिए । एक्कासि कोठामा पुरुषलाई देखेकी महिलाले चोर आयो भन्दै होहल्ला गरेकी थिइन् । हल्लापछि साउद भागेको स्थानीय लोकेन्द्र खड्काले बताए । अनैतिक व्यवहार देखाउने प्रहरी जवानमाथि कारबाहीको माग गर्दै स्थानीयवासीले सदरमुकाम चैनपुरमा प्रदर्शन गर्नुका साथै पीडित परिवारले जिल्ला प्रहरी कार्यालय बझाङमा उजुरी दिएका छन् । दोषी प्रहरीलाई विभागीय कारबाही गरिने डीएसपी ऋषिराज कँडेलले बताए ।