(PR) राजपा कार्यकर्ताले कौडेना गाउँपालिका–१ को वडाध्यक्षमा कांग्रेसबाट उम्मेदवारी दिएका मनोज साहलाई आक्रमण गरी घाइते बनाएका छन् । साहमाथि बिहीबार राति आक्रमण भएको हो । घरदैलो कार्यक्रम सकेर फर्कँदै गर्दा राजपा कार्यकर्ताले साहमाथि लक्ष्मीपुरमा आक्रमण गरेका थिए । आक्रमणमा घाइते भएका साहको जिल्ला अस्पताल मलंगवामा उपचार भइरहेको छ । उनको अनुहार र निधारमा चोट लागेको आफन्तले जनाएका छन् । आक्रमणमा संलग्न भएको आरोपमा सोही ठाउँका रामविनय साहलाई पक्राउ गरिएको जिल्ला प्रहरी कार्यालयका प्रहरी निरीक्षक चन्द्रभूषण यादवले जानकारी दिए । आक्रमणमा संलग्न अरू फरार रहेकाले खोजी भैरहेको उनले बताए । राजनीतिक कारणले साहमाथि आक्रमण भएको हुन सक्ने उनको भनाइ छ । घटनाको अनुसन्धान भइरहेको प्रहरीले जनाएको छ । सर्लाही कांग्रेस सभापति नागेन्द्र रायले घटनाको सत्यतथ्य छानबिन गरी दोषीलाई पक्राउ गर्न माग गरेका छन् ।