सल्यानको छत्रेश्वरी गाउँपालिका वडा नं ४ को वडा कार्यालयमा बिहीबार राति नचिनेको समूहले तोडफोड गरेको छ । गएराति झण्डै १२ बजेतिर पहिचान नखुलेको एक समूहले कार्यालयको ताला फोडेर फरार भएको छ । वडा कार्यालयको ताला तोडफोड गरी झन्डै २ लाख रुपैयाँ बराबरको क्षति गरेको वडा अध्यक्ष राज बहादुर बुढाथोकीले जानकारी दिनुभयो । अपरिचित समूहले कार्यालय भित्रको कम्प्यूटर, फोटोकपी मेशिन, सोलार, कुर्सी, दराज पूर्ण रुपमा तोडफोड गरेको बुढाथोकीले बताउनुभयो । महत्वपूर्ण कागकाज जलाइएको र केही पानीमा फालिएको अवस्थामा फेला परेको बताइएको छ । कार्यालयमा रहेको सामाजिक सुरक्षा भत्ताको ९ लाख ७० हजार रुपैयाँ केही नचलाइएको बुढाथोकीको भनाइ छ । तोडफोडमा संलग्नहरुको खोजी कार्य भई रहेको जिल्ला प्रहरी कार्यालय सल्यानले जनाएको छ ।