सशस्त्र प्रहरीका बहालवाला निरीक्षकले टोलको सामान्य विवादमा छिमेकीलाई सोमबार निर्घात कुटपिट गरेका छन् । विराटनगर महानगरपालिका-४ राम जानकी टोलमा टोल विकास संस्थाका अध्यक्ष दान बहादुर बुढाथोकी र उनका छोरा सिराहमा कार्यरत सशस्त्र प्रहरी निरीक्षक सुमन बुढाथोकीले छिमेकी खिलराज भट्टराईलाई कुटपिट गरेका हुन् । टोलका लागि आएको ह्युमपाइप अध्यक्ष दान बहादुरले टोलको बैठकै नबसी मनोमानी ढंगले बेच्न लागेपछि भट्टराईले विरोध जनाएका थिए ।निरीक्षक सुमनले गाली गलौज गर्दै एक्कासी मुक्का प्रहार गरेको पिडित भट्टराईले बताए । कुटपिटबाट भट्टराईको टाउकोमा चोट लागेको छ। स्थानीय सहित घटना स्थलमा भेला भएका आफन्तजनले घटनाबारे छानविन गरी कारवाही गर्न प्रहरी समक्ष माग गरेका छन् । घाइते भट्टराईको कोशी अंचल अस्पतालमा उपचार भइरहेको छ ।