Manohar Pokharel
सप्तरी । ०७० असार २९ गते
छोरा नजन्माएको भन्दै सासु तारादेवी यादव र ससुरा अम्बेश्वर यादवले कुटपिट गरेपछि घाइते भएकी इटहरी विष्णुपुर गाविस-३ की २८ वर्षीया सुशीला यादव उपचारका लागि असार २९ गते साँझ अस्पताल भर्ना भएकी छिन् ।
तीन छोरी जन्मे पनि छोरा नजन्मेकाले सासु र ससुराले शारिरीक र मानसिक यातना दिदै कुटपिट गर्ने गरेको भन्दै आठ महिनाकी गर्भवती सुशिला उपचारका लागि राजविराज नपा-३ स्थित सगरमाथा अञ्चल अस्पताल भर्ना भएकी हुन् ।
छोरा नजन्मेपछि वंश नै समाप्त हुने भन्दै सासु र ससुराले कुटेपछि मलेकपुर गाविस-५ खुरहुरियास्थित माइतबाट आएका दुई भाइ बिशो यादव र महेन्द्र यादवलाई समेत अपशब्द प्रयोग गर्दै कुटपिट गरेको पीडित महिलाले बताइन् ।
घाइते सुशीलाले उपचारका लागि घर परिवारसँग अनुनय विनय गरेपनि स्वास्थ्योपचार नगरि ज्यान मार्ने धम्की दिन थालेपछि एक्लै भागेर अस्पताल आएको उनले बताइन् ।
उनले तीनओटा छोरी पाएपछि चौथो पटक रहेको गर्भ चेकजाँच गराउँदा पुनः छोरी नै देखिएपछि सासु, ससुराले औषधी खुवाएर यसअघिको ६ महिनाको गर्भ तुहाइदिएको समेत बताइन् ।
तीनवटा छोरी भएकाले सासुससुराले निहुँ खोजी-खोजी कुटपिट गर्ने गरेको र पति सोझो भएकाले मौन बस्ने गरेको उनले बताइन् ।
मनोहरकुमार पोखरेल