राइनास नगरपालिका–९, कुँडुलेमा चिर्पट प्रहारबाट गम्भीर घाइते राइनास नगरपालिका–१०, सिमघारीस्थित रत्न प्राविका पूर्व प्रधानाध्यापक ५५ वर्षीय हितमान श्रेष्ठको उपचारका क्रममा न्युरो अस्पताल काठमाडौंमा मृत्यु भएको प्रहरीले जनाएको छ । डीएसपी पदमबहादुर विष्टका अनुसार कुँडुलेस्थित आफ्नै गाउँमा स्थानीय ३६ वर्षीय बेलबहादुर गुरुङले दाउराको चिर्पट प्रहार गरेपछि श्रेष्ठ गम्भीर घाइते भएका थिए । तत्काल लमजुङ जिल्ला सामुदायिक अस्पताल ल्याइएकोमा उपचार हुन नसकी उनलाई पोखरास्थित मणिपाल शिक्षण अस्पताल लगिएको थियो । मणिपालमा आइसियु सुविधा नभएको भनी फिस्टेल हस्पिटलमा रिफर गरेको थियो । फिस्टेलमा पनि उपचार सम्भव नभएपछि काठमाडौंस्थित न्युरो अस्पताल पठाएकोमा उपचारका क्रममा सोमबार अपरान्हतिर मृत्यु भएको प्रहरीले जनाएको छ । प्रहरीका अनुसार घटना भएको दिन दुवैले मादक पदार्थ सेवन गरेका थिए । दुवैजना मिल्ने साथी रहेको र राति साँस्कृतिक कार्यक्रम हेरेर फर्कने क्रममा झगडा भएको प्रहरीले जनाएको छ । पीडक बेलबहादुर पनि सामान्य घाइते छन् । उनी फरार रहेको प्रहरीले जनाएको छ । प्रहरीले बेलाबहादुरविरुद्ध यसअघि ज्यान मार्ने उद्योग अन्तर्गत मुद्दा चलाइएकोमा अब मुद्दा कर्तब्यमा ज्यानमा परिणत हुने बताएको छ ।