नेत्रविक्रम चन्द नेतृत्वको नेपाल कम्युनिष्ट पार्टीले धनकुटाका सम्पूर्ण स्थानीय तहहरू खाली गर्न चैत ६ गते पत्राचार गरेको छ । अहिलेको राज्य व्यवस्था काम नलाग्ने भन्दै स्थानीय तह खाली गर्नका लागि पाख्रिबास नगरपालिका र शहीदभूमी गाउँपालिकामा सो पार्टीले पत्र पठाएको हो । सो पार्टीले पठाएको पत्रमा जिल्लाका सम्पूर्ण गाउँपालिका र नगरपालिकाहरू खाली गर्न भनिएको छ । पाख्रिबास नगरपालिका र शहीदभूमी गाउँपालिकालाई कार्यालय खाली गर्नलाई सो पार्टीनकट लिम्बूवान स्वायत्त प्रदेश जिल्ला जनपरिषदद्वारा पत्र आएको सम्बन्धित स्थानीय तहका प्रमुखहरूले बताएका छन् । परिषदका जिल्ला प्रमुख कालरात्रीद्वारा चैत ४ गते प्राप्त पत्रमा शहीदभूमीलगायत जिल्लाका सम्पूर्ण नगरपालिका र गाउँपालिका खाली गर्न ‘उर्दी’ जारी गरिएको शहीदभूमी गाउँपालिकाका अध्यक्ष मनोज राईले बताए । यसैबिच सो पार्टी केन्द्रीय सदस्य तथा मध्य कोशी व्यूरो इञ्चार्ज ४३ वर्षीय किरण राईसहित आठ जनालाई प्रहरीले धनकुटाको हिले बजारबाट चैत ५ गते गिरफ्तार गरेको छ । प्रहरीले सो पार्टी कोशी व्यूरो सदस्य सागर भनिने २९ वर्षीय दिप्सन लिम्बू, धनकुटा इञ्चार्ज आकाश शर्मा भनिने ४० वर्षीय माधव गौतम, सङ्खुवासभा इञ्चार्ज ३५ वर्षीय राजकुमार दङ्गाल, सङ्खुवासभा सेक्रेटरी ४२ वर्षीय दिव्य बराल, धनकुटा सेक्रेटरी ३१ वर्षीय नवराज भट्टर्राई, तेह्रथुम सेक्रेटरी ४२ वर्षीया कमला लिम्बू र साधारण सदस्य १९ वर्षीय फुर्वा तामाङलाई गिरफ्तार गरिएको जिल्ला प्रहरी कार्यालय धनकुटाका डिएसपी गौतम मिश्रले बताए । स्थानीय तह खाली गर्न भन्दै जिल्लाका नगरपालिका र गाउँपालिकाहरूमा पत्र पठाएको र चन्दा आतङ्क मच्चाएकाले उनीहरूलाई बैठक बसिरहेको अवस्थामा होटल हिले भ्यूबाट प्रहरीले गिरफ्तार गरेको डिएसपी मिश्रले बताए । सन्तोष रूचाल