पाँचखपन नगरपालिकाको ८ र ९ नम्बरका वडा अध्यक्ष माथि नेत्रविक्रम चन्द नेतृत्वको नेपाल कम्युनिष्ट पार्टीका कार्यकर्ताले धम्की दिएपछि तीन दिनदेखि वडा कार्यालय बन्द भएका छन् । गत चैत २९ गते राति नेकपाका कार्यकर्ताले चुङखुरुङमा रहेको संयुक्त वडा कार्यालय परिसरमा झण्डा गाडेर विज्ञप्ति प्रकाशन गर्दै कार्यालय नखोल्ने उल्लेख गरेको वडा नम्बर ८ का अध्यक्ष छत्र न्यौपानेले बताए । अहिलेको लडाइ दलाल सरकारको विरूद्व भएको र दलाल सरकारका सम्पूर्ण काम काज ठप्प पार्ने नेकपाद्वारा जारी विज्ञप्तिमा उल्लेख छ । नेकपाका कार्यकताले विभिन्न नम्बरबाट फोन गर्दै कार्यालय खोले कडा कारबाही गर्ने धम्कीसमेत दिएको वडा अध्यक्ष न्यौपाने बताए । अहिले उत्पन्न भएको समस्याका बारेमा जिल्ला प्रशासन कार्यालय र सुरक्षा निकायमा खबर गरिसकिएको पाँचखपन नगरपालिकाका मेयर विपिन राईले बताए । उनले भने-‘आइतबार नै कार्यपालिकाको बैठक बसेपनि ठप्प भएको कामकाजको कसरी समाधान गर्ने भन्ने विषयमा कुनै ठोस निकास आउन सकेको छैन ।’ कार्यालय अनिश्चितकालका लागि बन्द भएपछि सेवाग्राही मारमा परेका छन् । यस घटनाको अनुसन्धान भइरहेको जिल्ला प्रहरी कार्यालय सङ्खुवासभाका इन्स्पेक्टर बेदप्रसाद गौतमले बताए ।