धुनीबेसी नपा-३ जिवनपुरमा सञ्चालित जीवनपुर इँटा उद्योगमा अज्ञात समूहले जेठ ७ गते बिहान कोही नभएको मौकामा अज्ञात समूहले इँटा भट्टामा सकेट बम विष्फोट गराएको पीडित पक्षले जनाएको छ । बम विष्फोटका कारण इँटा भट्टाको चिम्नी, जेनेरेटर, ट्याक्टरलगायतका सामग्रीमा गरी ६ लाख रुपियाँ बराबरको नोक्सानी भएको इलाका प्रहरी कार्यालय खानीखोलाका इन्स्पेक्टर जीवन निरौलाले बताए । घटनाको अनुसन्धान भइरहेको र उद्योगमा विष्फोट गराउने समूहको खोजी भइरहेको प्रहरीले जनाएको छ । ६ महिनाअघि नेत्रविक्रम चन्द (विप्लव) नेतृत्वको नेपाल कम्युनिष्ट पार्टीले चन्दा मागेको र चन्दा नदिएकाले उक्त विष्फोट गराएको हुनसक्ने अनुमान गरिएको छ । ६ महिनाअघि उक्त पार्टीका कार्यकर्ताले चन्दा मागेपछि इँटा भट्टाका सञ्चालक पुरुषेत्तम महर्जनले प्रहरीमा खबर गरेका थिए । ६ सय मजदुरले काम गर्ने उक्त भट्टामा मजदुरहरू नभएको मौकामा विष्फोट गराएको जनाइएको छ ।