बहुअपाङ्गता भएकी २८ वर्षीया महिललाई बलात्कार गरेको आरोपमा प्रहरीले नीलकण्ठ नगरपालिका-१२ का ३५ वर्षीय बही घलेलाई असार १ गते गिरफ्तार गरेको छ । मौखिक उजुरीका आधारमा आरोपितलाई असार १ गते नै गिरफ्तार गरेको भएपनि पीडित पक्षले जिल्ला प्रहरी कार्यालयमा असार २ गते उजुरी दर्ता गराएको छ । बौद्धिक अपाङ्ता, बहिरा र शारीरिक अपाङ्गता भएकी महिलालाई आरोपितले असार १ गते बलात्कार गरेको पीडित पक्षको आरोप छ । घटनापछि गाउँबासीको सहयोगमा पीडितको उद्धार गरी असार १ गते जिल्ला अस्पतालमा उपचारका लागि लगिएकोमा अवस्था गम्भीर भएकाले असार २ गते थप उपचारका लागि थापाथली स्थित प्रसूति गृहमा लगिएको जिल्ला प्रहरी कार्यालयका डिएसपी रामबहादुर केसीले बताए । पीडित महिलाको यौनाङ्गबाट धेरै रगत बगेपछि जिल्ला अस्पतालमा रगत दिइएको थियो । घाउ भएको ठाउँमा टाँका लगाइएको र अवस्था गम्भीर रहेको प्रहरीले जनाएको छ ।