सुनवल नगरपालिकास्थित महाकवि देवकोटा मावि कक्षा १० मा अध्यनरत १६ वर्षीय प्रदिप कहारलाई शारीरिक दण्ड दिएको आरोपमा भदौ २५ गते विद्यालय व्यवस्थापन समितिले ४८ वर्षीय शिक्षक कौशलराज तिवारी र प्रधानाध्यापक ४२ वर्षीय बाबुराम पाण्डेलाई १० दिनका लागि निलम्बन गरेको छ । पीडित कहारले भदौ १९ गते राम्रो पढाइ नभएको भनेपछि कक्षा कोठामा शिक्षक तिवारीले कुटपिट गरेको र प्रअ पाण्डेलेसमेत कुटपिट गरेको पीडितका साथी धिरज पाण्डेले बताए । पीडित पक्षले घटनाका बारेमा सुनवल नगरपालिकामा भदौ २३ गते उजुरी दिएको थियो । नगरपालिकाका कार्यकारी अधिकृत रामलाल श्रेष्ठले कारवाहीका लागि विद्यालय व्यवस्थापन समितिलाई जिम्मा दिइएको बताए । विद्यालय व्यवस्थापन समितिका अध्यक्ष ज्ञानहरी अर्यालले अनुसन्धानलाई सहज बनाउन १० दिनका लागि निलम्बन गरिएको बताए ।