राजविराज नपा–१५ मुसहर्नियाकी १८ वर्षीया प्रेमकला ठाकुरलाई २५ वर्षीय पति मनोज ठाकुर र ४५ वर्षीया सासू रधियादेवी ठाकुरले कुटपिट गरी घाइते बनाएको भन्दै पीडितका बुवा रुपनी गाउँपालिका–१ रायपुरका ४० वर्षीय मोहन ठाकुरले जिल्ला प्रहरी कार्यालयमा असोज १४ गते उजुरी दिएका छन् ।
मादक पदार्थ सेवन गरेका पतिले ‘चरित्रहीन’को आरोप लगाउँदै असोज ११ गते राति कपाल घिस्याएर लाठी र मुक्काले कुटपिट गर्दा उनको शरीरभरी चोटपटक र निलडाम लागेको छ ।
कुटपिटबाट बेहोस पीडितलाई उनका बुवा मोहन ठाकुरले उद्धार गरी असोज १२ गते राजविराजस्थित गजेन्द्रनारायण सिंह सगरमाथा अञ्चल अस्पताल भर्ना गराएका छन् ।
शरिरभरी जताततै चोटपटकको निलडाम लागेकी पीडितको उजुरी आएकोले पीडितको असोज १५ गते घाउजाँच परीक्षण गरी कारवाही प्रक्रिया अगाडि बढाइने जिल्ला प्रहरी कार्यालयका एसपी राजेन्द्र विष्टले बताए । घाइतेको सोही अस्पतालमा उपचार भइरहेको छ ।
सामाजिक परम्परा अनुसार ०७४ वैशाख ३ गते विवाह गरेका पीडितका पति मनोज ०७४ असारको पहिलो साता रोजगारीका लागि मलेशिया गएपछि घरनिकाला भएकी पीडित रुपनी गाउँपालिका–१ रायपुरस्थित माइतीघरमा विस्थापित भएकी थिइन् ।
पति विदेशबाट फर्केपछि पीडित भदौ २० गते घर गएकी थिइन् । पीडितले विवाह दर्ता र नागरिकता बनाइदिन भन्दा आरोपितहरूले चरित्रहीनको आरोप लगाई अर्को विवाह गर्ने धम्की दिँदै मरणासन्न हुने गरी कुटपिट गरेको पीडितको आरोप छ ।