लेखनाथ खतिवडा पाँचथर, असोज १६ राष्ट्रिय परिचयपत्रका लागि विवरण संकलन गर्न गएका एक कर्मचारीमाथि आक्रमण भएको छ । विवरण संकलनका लागि पाँचथरको फालेलुङ गाँउपालिकामा खटिई गएको टोलीमा रहेका कर्मचारी निराजन अधिकारीमाथि आइतवार राती आक्रमण भएको हो । अधिकारी बस्ने गरेको घरकै व्यक्तिले सामान्य विवादमा उनीमाथि आक्रमण गरेको जिल्ला प्रहरी कार्यालय पाँचथरले जनाएको छ । फालेलुङ गाँउपालिका वडा नं. १ मा विवरण संकलन गर्न गएको टोलीमा सहभागी अधिकारी स्थानीय हरिषचन्द्र खड्काको घरमा वस्दै आएका थिए । आइतवार राती खाना खाएर उठ्ने क्रममा खड्काले एक्कासी फलामको बामफोकले अधिकारीको टाउकोमा प्रहार गरेका थिए । बामफोक प्रहारबाट अधिकारीको टाउकोमा चोट लागेको छ । उनको पाँचथर जिल्ला अस्पतालमा उपचार भइरहेको र स्वास्थ्य अवस्था सामान्य रहेको प्रमुख जिल्ला अधिकारी प्रकाशचन्द्र अधिकारीले जानकारी दिए । अधिकारीलाई आक्रमण गर्ने खड्कालाई स्थानीयसमेतको सहयोगमा प्रहरीले नियन्त्रणमा लिएको थियो । उनलाई पाँचथर जिल्ला अदालतबाट ज्यान मार्ने उद्योग मुद्दामा म्याद थप गरि अनुसन्धान प्रकृया अघि बढाइएको जिल्ला प्रहरी कार्यालय पाँचथरले जनाएको छ ।