बाँकेमा शनिबार बिहान एक जनाको छुरा प्रहारबाट मृत्यु भएको छ । मृत्यु हुनेको पहिचान राप्ति सोनारी गाउँपालिका-१ निवासी २७ बर्षीय हरि बहादुर बुढा मगर भएको खुलेको छ । हरि बहादुरलाई गभरस्थित थकाली होटेलका संचालकले विवादको क्रममा छुरा प्रहार गरेका थिए । उनको उपचारको क्रममा कोहलपुरस्थित नेपाल मेडिकल कलेज टिचिङ अस्पतालमा मृत्यु भएको छ । घटनामा संलग्न भएको आरोपमा प्रहरीले होटेल संचालक चन्द्र किरण शाह र गणेश शाहलाई पक्राउ गरेको इलाका प्रहरी कार्यालय कोहलपुरले जनाएको छ ।