Manohar Kumar Pokharel
संविधानसभाको निर्वाचन बहिष्कार गर्ने नीति लिएको सशस्त्र भूमिगत समूह अखिल तराई मुक्ति मोर्चाका एरिया इन्चार्ज गोबरगाढा गाविस-३ का २५ वर्षीय प्रदीपकुमार मुखियालाई प्रहरीले कात्तिक २६ गते हतियारसहित गिरफ्तार गरेको छ ।
सुरक्षाको दृष्ट्रिले अन्यन्तै संवेदनशील गाविसका रुपमा रहेको गोबरगाढा गाविस-३ स्थित मुखियाको घरबाटै उनलाई हतियारसहित गिरफ्तार गरेको प्रहरीले जानकारी दिएको छ ।
मुखियाको साथबाट एक थान सकेट बम, एक थान कटुवा पेस्तोल र त्यसमा प्रयोग हुने दुई राउण्ड गोली बरामद भएको जिल्ला प्रहरी कार्यालयका डिएसपी श्यामसिंह चौधरीले जानकारी दिए ।
तराईमा सशस्त्र आन्दोलन गर्दै आएको भूमिगत समूह अखिल तराई मुक्ति मोर्चाका केन्द्रीय संयोजक जयकृष्ण गोइतले आगामी संविधानसभाको निर्वाचन बहिष्कार गर्ने बताएका छन् ।
गोइत नेतृत्वको मोर्चाले संविधानसभाको पहिलो निर्वाचन २०६४ सालमा पनि बहिष्कार गरेका थिए भने आगामी निर्वाचनको पनि सशक्त विरोध गर्ने बताउँदै आएका छन् ।
मनोहरकुमार पोखरेल