सुनसरी सदरमुकाम इनरुवाकी ५० वर्षीया महिलालाई बोक्सी आरोपमा कुटपिट गर्ने एकजनालाई पक्राउ गरेको छ। इनरुवा १० का ५८ वर्षीय पवन शर्मा खत्वेलाई पक्राउ गरी मुद्धा चलाइएको सुनसरीका प्रहरी प्रमुख एसपी राजन अधिकारीले बताए।

वैशाख १२ गते छोराको विवाह भोजमा आएका बेला बेहुलाका बाबु खत्वेले ती महिलालाई बोक्सीको आरोप लगाउँदै कुटपिट गरी घाइते बनाएको प्रहरीले जनाएको छ। कुटपिट पश्चात फरार रहेका खत्वेलाई पीडित महिलाको उजुरीको आधारमा पक्राउपश्चात बुधबार मुद्धा दर्ता गरी कारबाही अगाडि बढाइएको एसपी अधिकारीले बताए।

उनका अनुसार खत्वेलाई जिल्ला अदालत सुनसरीमा पाँच दिनको म्याद थपगरी अनुसन्धान सुरु गरिएको छ। कुटपिटबाट घाइते ती महिलाको जिल्ला अस्पतालमा उपचार गरी घर लगिएको छ।