उदयपुर, १५ जेठ    धारिलो हतियार खुकुरी प्रहार गरेको अभियोगमा बेलका नगरपालिका-६ लामीडाँडा बस्ने ४१ वर्षीय छत्र बहादुर राईलाई मंगलबार राति प्रहरीले पक्राउ गरेको छ । घरमा पारिवारिक जमघट भइरहेको अवस्थामा छत्रबहादुरले आफ्नै जेठान सोही स्थान बस्ने ४१ वर्षीय देविन राईलाई खुकुरी प्रहार गरेको भन्ने खबर प्राप्त हुनासाथ ईलाका प्रहरी कार्यालय रामपुर ठोक्सिलाबाट खटिएको प्रहरीले छत्रबहादुरलाई १ थान खुकुरी सहित पक्राउ गरेको हो । घाइते देविन राईलाई उपचारको लागि धरान घोपा सुनसरी लगिएको छ । यस सम्बन्धमा प्रहरीले थप अनुसन्धान गरिरहेको छ ।