कंचनपुरको सुक्लाफाँटा नगरपालिका-१ बन्सहामा रहेको अनुपम एजुकेसनल एकेडेमीमा बुधबार दिउँसो छिरेकी एक महिलाले तोडफोड गरेकी छिन् । ४६ बर्षीय चम्पा बिष्टले बिध्यालयको कार्यालय कक्षमा तोडफोड गर्दा चार लाख बराबरको क्षति भएको बिध्यालय संचालक समितिका अध्यक्ष मदनराज जोशीले बताए । बिष्टले बिध्यालय रहेको जग्गा आफ्नो भएको भन्दै कार्यालय कक्षमा रहेको २ थान कम्प्युटर, प्रिन्टर, दराज, ल्यापटप, साउण्ड सिस्टम, खेलकुदका सामग्री, प्रयोगशालाका सामग्री, कुर्शी र तबल तोडफोड गरेको जोशीले जनाए ।

जोशीले भने ' पहिला बिध्यालयमा पढ्ने बिध्यार्थीको अभिभावक होला भनेर सोचेका थियौं, केहि गुनासो राख्न आउनुभएको होला भनेर कुरा सुन्यौं । बिध्यालय रहेको जग्गा नै आफ्नो भएको दाबी गर्दै तोडफोड गर्न थालेपछि प्रहरी बोलाएर नियन्त्रणमा राख्न लगाएका छौं '। प्रहरी निरीक्षक  अवस्थीले तोडफोड गर्ने महिलालाई नियन्त्रणमा लिएर अनुसन्धान भइरहेको बताए।