अदानचुली गाउँपालिकाको प्राविधिक शाखामा साउन ५ गते बिहान अज्ञात पक्षले तोडफोड गरेको छ । उक्त पक्षले शाखामा भएको कम्प्युटर, हार्डडिक्स र क्यामरा लानुका साथै बेन्च, डेस्क, टेबल, दराजलगायत विभिन्न महत्वपुर्ण कागजात नष्ट गरेको अदानचुली गाउँपालिकाका अध्यक्ष दल फडेराले बताए ।

 अध्यक्ष फडेराले केही दिन अघि पनि अक्षत पक्षले कार्यालयमा रहेको इञ्जिनियर अङ्कित ‘नेम प्लेट’ फुटाएको बताए ।

 कार्यालय नजिकै रहेको सूचना बोर्डमा अखिल क्रान्तिकारी लेखिएको सूचनामा गाउँपालिकामा कार्यरत इञ्जिनियरले परियोजनाहरूबाट पैसा उठाएकोले तोडफोड गरी सामग्री लगेको भन्ने उल्लेख गरिएको भेटिएको फडेराले जानकारी दिए ।

 गाउँपालिकाले भने कुनै पनि प्राविधिकहरूलाई कुनै पनि योजनाहरूबाट पैसा नउठाउन निर्देशन दिएकोले कसैले पनि पैसा नउठाएको बताउँदै प्रमाण सहित आए तुरन्त कारवाही गर्ने जनाएको छ ।

 तोडफोड घटनामा संलग्न पक्षको खोजी कार्य जारी रहेको अस्थायी प्रहरी पोष्ट, श्रीनगरका असई नारायणदत्त बडुले बताए । बडुले सो घटनाका बारेमा जिल्ला प्रहरी कार्यालय, हुम्लामा जानकारी गराइसकेको बताए ।

 नेत्रविक्रम चन्द (विप्लव) नेतृत्वको प्रतिबन्धित नेकपाको जिल्ला सङ्गठन समितिले भने आफूलाई आरोप आउनसक्ने ठम्याएर साउन ५ गते नै विज्ञप्ति जारी गर्दै घटनामा आफ्नो संलग्नता नरहेको जनाएको छ ।

नन्द सिंह