वडाध्यक्षसहितको समूहले कुटपिट गर्दा केपिलासगढी गाउँपालिका–५ सप्तेश्वरका ३० वर्षीय महेश राई घाइते भएका छन् ।

साउन ३१ गते दिउँसो भएको आपसी विवादपछि सोही राति कुटपिट हुँदा राई घाइते भएका हुन् । अचेत बनेका घाइतेको स्थानीय स्वास्थ्य संस्थामा समेत होस नखुलेपछि भदौ १ गते हेलिकोप्टरमार्फत केएमसी अस्पताल काठमाडौँ लगिएको छ ।

१ लाख ८० हजार रुपियाँमा हेलिकोप्टर चार्टर गरेर काठमाडौँ पठाइएको घाइतेका दाजु इश्वर राईले बताए ।

अचेत अवस्थामै काठमाडौँ पुर्‍याइएका महेशको टाउको तथा गालामा चोट लाग्नुका साथै शरीरको विभिन्न अङ्गमा निलडाम देखिएको छ ।

 कुटपिटमा संलग्न रहेको आरोपमा सोही वडाका वडाध्यक्ष ४० वर्षीय खगेन्द्र राई सहित अन्य चार जना र घाइतेका आफन्तलाई जिल्ला प्रहरी कार्यालय झिकाइएको डिएसपी वामदेव गौतमले बताए ।

घाइते महेश र वडाध्यक्ष खगेन्द्रबीच वडा कार्यालय भवन निर्माणमा उपभोक्ता समिति गठन गर्ने विषयलाई लिएर विवाद भएको जनाइएको छ । दिउँसोको विवादपछि बेलुकी पीडितको घरैमा गएर निर्घात कुटपिट गरेको आफन्तले बताए ।

रामधन राई