सुनसरी धरान उपमहानगरपालिका-१४ तुर्केमा मंगलबार बेलुका छुरा प्रहारबाट एक जना घाइते भएका छन् । रातिको समयमा बर्ष २० का रञ्जित तामाङलाई सोही स्थानका १९ बर्षीय पारुहाङ राई र टुइके भनिने राजकुमार तामाङले एक्कासी छुरा प्रहार गरेका थिए।

घटनाको जानकारी पाए लगत्तै अस्थायी प्रहरी पोष्ट नयाँ बसपार्क धरान र इलाका प्रहरी कार्यालय धरानबाट खटिएको प्रहरी टोलीले घाइतेलाई उद्धार गरी उपचारको लागि बीपी कोइराला स्वास्थ्य विज्ञान प्रतिष्ठान धरान पठाएको थियो । 

छुरा प्रहारबाट शरीरको छाती र ढाडमा चोट लागेका तामाङको सोही अस्पतालमा उपचार भइरहेको छ भने घटनामा संलग्न राजकुमार राईलाई प्रहरीले नियन्त्रणमा लिएको छ। अर्का आरोपी पारुहाङ राई तत्काल फरार रहेकोले खोजतलास भइरहेको उक्त कार्यालयले जनाएको छ।