सौतेनी आमाको कुटपिटबाट घाइते भएकी वीरेन्द्रनगर नपा–११ की सात वर्षीया कमला महतराको ११ दिनदेखि कर्णाली प्रदेश अस्पतालको आइसियु कक्षमा उपचार भइरहेको छ ।

पहिले पनि कुटपिट गर्दै आएकी सौतेनी आमा ३५ वर्षीया मानकुमारी महतराले नाबालिकालाई असोज १ गते मरणासन्न हुने गरी कुटपिट गरेको पीडित बालिकाका बाबु तिर्थबहादुर महतराले बताए ।

कुटपिटबाट दुवै गोडा, टाउको र ढाडमा गम्भीर चोट लागेकी बालिकाका आफन्तले असोज ३ गते प्रदेश अस्पतालमा भर्ना गरेपछि मात्र आफूले खबर पाएको बुबा तिर्थबहादुर महतराले बताए । नेपाली सेनामा जागिरे महतरा काठमाडौँमा कार्यरत् छन् ।

पीडित बालिकालाई कुटपिट गरेको आरोपमा प्रहरीले असोज ४ आरोपित कमला महतरालाई गिरफ्तारपछि जिल्ला प्रहरी कार्यालय, सुर्खेतको हिरासतमा राखी अनुसन्धान गरिरहेको जिल्ला प्रहरी कार्यालयका एसपी डिल्लीराज पन्तले बताए ।

पीडित बालिकाको उपचारमा संलग्न प्रदेश अस्पतालका डाक्टर डम्मर खड्काले ११ दिनदेखि आइसियुमा राखी नबालिकाको उपचार भइरहेको र हाल उनको स्वास्थ्य अवस्थामा सुधार आएको बताए ।

जेठी पत्नी सीता महतरा तीन वर्षअघि अर्को विवाह गरेर गएपछि तिर्थले ०७५ माघमा मानकुमारीसँग विवाह गरेका थिए ।

वीरेन्द्रनगर नपा–११ मा रहेको गङ्गामाला आधारभुत विद्यालयको कक्षा १ मा अध्ययनरत कमलालाई सौतेनी आमाले नियमित रूपमा कुटपिट गर्दै आएको र पछिल्लो पटकको कुटपिटपछि कमला विद्यालय नआएपछि उनको खोजी गर्दा घरमै घाइते अवस्थामा फेला परेको विद्यालयका प्राधानाध्यापक दानबहादुर वलीले जानकारी दिए ।

दुर्गा थापा

दुर्गा थापा