चौतारा साँगाचोकगढी नगरपालिका–१ की ३६ वर्षीया देवी लामालाई पति ४० वर्षीय आशिष लामाले ०७७ वैशाख ३१ गते बेलुका कुटपिट गरेर घाइते बनाएपछि पीडितलाई चौतारा अस्पतालमा उपचारको लागि भर्ना गरिएको छ ।

पतिले घरको ढोका थुनेर पिर्काले कुटपिट गरेर घाइते बनाएपछि छिमेकीसँग गुहार मागेर बाँचेको पीडितले बताउनु भयो । पीडितलाई स्थानीय छिमेकीको सहयोगमा उपचारको लागि चौतारा अस्पताल लगिएको थियो ।

पीडितको सोही दिन बेलुका जिल्ला प्रहरी कार्यालयमार्फत चौतारा अस्पतालमा घाउजाँच तथा उपचार भइरहेको जिल्ला प्रहरी कार्यालयका डिएसपी माधवप्रसाद काफ्लेले बताउनु भयो ।

पीडितको उपचारपछि आरोपित विरुद्ध उजुरी लिएर दर्ता गरिने डिएसपी काफ्लेले बताउनु भयो । डिएसपी काफ्लेले आरोपितलाई प्रहरी निगरानीमा राखिएको र उपयुक्त समयमा घटनाको अनुसन्धान गरिने बताउनु भयो ।

नातिबावु धिताल