१३ वर्षीया बालिकालाई बलात्कार गरेको आरोपमा बेसीशहर नपा–९ का १८ वर्षीय शंकर विकविरूद्ध पीडित पक्षले जेठ २५ गते बेसीशहर नगरपालिकाको न्याय समितिमा उजुरी दिएको न्याय समितिका संयोजक लक्ष्मी अधिकारीले बताउनुभयो ।

पीडितलाई आरोपितले ०७६ कात्तिक १० गते बलात्कार गरेपछि धम्काएको हुनाले घटनाको जानकारी नभएको र पीडित गर्भवती भएपछि घटना बाहिर आएको पीडित पक्षले जनाएको छ । आरोपित हाल फरार रहेका छन् ।

पीडितको स्वास्थ्य परीक्षण जिल्ला सामुदायिक अस्पताल बेसीशहरमा जेठ २५ गते गरिएको अस्पतालका मेडिकल अफिसर हिक्मत भण्डारीले बताउनुभयो ।

सानो उमेरमा गर्भवती भएकी पीडितको स्वास्थ्य समस्या देखिएकाले सोही दिन चितवन मेडिकल कलेज भरतपुर रिफर गरिएको जिल्ला सामुदायिक अस्पतालका प्रशासक प्रमुख हेमन्त श्रेष्ठले बताउनुभयो ।

पीडितको उपचारपछि जिल्ला प्रहरी कार्यालयमा सिफारिस गरिने न्याय समिति संयोजक अधिकारीले जानकारी गराउनुभयो ।

दलबहादुर मजाकोटी