१८ वर्षीया यूवतीलाई सामूहिक बलात्कार गरेको आरोपमा लहान नपा–२१ का २२ वर्षीय रोहित भनिने शुभकलाल दास, २२ वर्षीय विजयकुमार दास, २१ वर्षीय संजय दास, २१ वर्षीय जयप्रकाश दास र कर्जन्हा नपा–८ की २५ वर्षीया आरती साहविरुद्ध पीडितले इलाका प्रहरी कार्यालय लहानमा साउन २४ गते उजुरी दिनु भएको छ ।

पीडित यूवतीका अनुसार आरोपित आरतीले शुभकलालसँग चिनजान गराइ दिएको र साउन १३ गते उनीसँग उनको घर घुम्न जाँदा आरोपितहरूले सामूहिक बलात्कार गरेको पीडित यूवतीले इन्सेक प्रतिनिधिलाई बताउनु भयो ।

आफूले सबैलाई नचिनेका कारण स्थानीयहरूसँग न्यायको लागि पहल गरिदिन आग्रह गर्दा उजुरी दिन ढिलो भएको पीडितले इन्सेक सिरहा प्रतिनिधिलाई बताउनु भयो ।

घटनाको मौखिक जानकारी साउन २३ गते नै आएकोले आरोपितहरूमध्ये विजयकुमार दासलाई सोहि दिन गिरफ्तार गरेको र अन्य आरोपितहरू फरार रहेकोले खोजतलास भइरहेको इलाका प्रहरी कार्यालय लहानका डिएसपी शरतकुमार थापा क्षेत्रीले बताउनु भयो ।

यूवतीको स्वास्थ्य परीक्षण लहानस्थित रामकुमार उमाप्रसाद अस्पतालमा साउन २३ गते भएको छ ।

दुर्गा परियार