सोमबार साँझ तरकारी बजार बन्द गराउन गएका प्रहरी र तरकारी व्यापारीबीच  झडप भएको छ । निषेधाज्ञा भएको ठाउँमा भिडभाड गरेको भन्दै प्रहरी तरकारी बजार बन्द गर्न गएको थियो । 

प्रहरी निरिक्षकको कमाण्डमा रहेको प्रहरीले बारम्बार सम्झाउँदा समेत बजार हटाउन नमानेपछि प्रहरीले कडाइका साथ बजार हटाउन खोज्दा प्रहरीमाथि तरकारी व्यापारीहरुले अभद्र व्यवहार र ढुंगामुढा गरेका छन । 

सोहि क्रममा एक प्रहरी जवानको हातमा चोट लागेको र प्रहरीको जिपमा समेत सामान्य क्षति पुगेको जिल्ला प्रहरी कार्यालय महोत्तरीका प्रवक्ता डिएसपी प्रकाश विष्टले बताए । 

उनले प्रहरीमाथि ढुंगामुढा गर्ने र जिपमा क्षति पुर्याउने केहि तरकारी व्यापारीलाई नियन्त्रणमा राखेको भन्दै कारबाही हुन सक्ने बताए । उनले हाल सरसल्लाह भइरहेकोले कारबाही नै गर्ने वा अन्य के हुने तत्काल भन्न नसकिने बताए । 

यता तरकारी व्यापारीहरुले आफुहरुको तरकारी प्रहरीले फ्याकिदिएको,बच्चामाथी समेत कुटपिट गरेको,महिलाहरुमाथी हातपात गरेको आरोप लगाएका छन् । 

सोमबार साँझको घटनापछि मंगलबार बिहान जलेश्वर बजार सुनसान देखिएको छ ।  प्रहरीले निषेधाज्ञालाई कडाई गरेको छ ।