मन्थली नगरपालिकाकी एक ३१ वर्षीया महिलाले ०७७ भदौ ७ गते लिखुतामाकोसी गाउँपालिका अध्यक्ष ४५ वर्षीय गोविन्दबहादुर खड्का विरुद्ध जिल्ला प्रहरी कार्यालय रामेछापमा बलात्कारको उजुरी दर्ता  गराउनुभएको छ ।

अध्यक्ष खड्काले आफूलई नौ महिना अगाडि डर, त्रास र प्रलोभनमा फसाई बलात्कार गरेको पीडितको आरोप छ । खड्का विरुद्ध पीडित महिलाले बलात्कारको उजुरी दर्ता गराएको जिल्ला प्रहरी कार्यालय रामेछापका सूचना अधिकारी टेकेन्द्र पौडेलले जानकारी दिनुभयो । ती महिलाको भदौ ७ गते प्राथमिक स्वास्थ्य केन्द्र मन्थलीमा स्वास्थ्य परीक्षण गरिएको छ ।

शरीर बन्धक अभियोगमा साउन ३० गते प्रहरीले पक्राउ गरी अनुसन्धानका क्रममा जिल्ला प्रहरी कार्यालय रामेछापकोे हिरासतमा रहेका अध्यक्ष खड्का विरुद्ध ०७७ भदौ ७ गते नै ठगीको उजुरी पनि दर्ता भएको थियो ।

अध्यक्ष खड्का विरुद्ध एक उपभोक्ता समितिका अध्यक्षलाई बन्धक बनाई खाली चेकमा जबरजस्ती हस्ताक्षर गर्न लगाएको अभियोग छ ।

त्यस्तै स्थानीय एक वृद्धको २१ रोपनी जग्गा गाउँपालिकाको लागि २ करोड रुपैँयामा खरिद गर्ने सहमति गरेर आफ्नै साली नाता पर्ने महिलाको नाममा पास गराई पैसा नदिएको ठगिको अभियोग पनि रहेको ।

अध्यक्ष विरुद्धका तीन वटै मुद्दामा एकै साथ अनुसन्धान अघि बढ्ने प्रहरीले जनाएको छ । खड्कालाई मावन बन्धक अभियोगमा साउन ३० देखि १७ दिनसम्म हिरासतमा राखेर अनुसन्धान गर्न यस अघिनै अदालतले प्रहरीलाई अनुमति दिएको छ ।

नवराज पथिक