दार्चुला — शैल्यशिखर नगरपालिका–२ देथलाका ४८ वर्षीय शेरबहादुर चन्दको धारिलो हतियार प्रहार गरी हत्या गरिएको छ । बिहीबार स्थानीय गंगादत्त भट्टले घरेलु हतियार प्रयोग गरी चन्दको हत्या गरेको प्रहरीले जनाएको छ ।

घाँटी नजिक घरेलु हतियार प्रयोग गरी चन्दको हत्या गरेर फरार रहेका भट्टलाई प्रहरीले पक्राउ गरेको छ । रातभरि फरार भट्टको खोजी गर्दा जंगलमा भेटिएको जिल्ला प्रहरी कार्यालयका सूचना अधिकारी सुरेन्द्रप्रसाद जोशीले बताए । हत्या घटनाका आरोपीलाई जिल्ला प्रहरी कार्यालय दार्चुला ल्याइरहेको छ । घटनाबारे थप अनुसन्धान भइरहेको प्रहरीले जनाएको छ ।