मोरङको सुन्दरहरैंचा नगरपालिका–३ आइतबारेमा बोक्सीको आरोपमा महिलामाथि कुटपिट भएको छ । स्थानीय २९ वर्षीया धनहीरा राईले छिमेकी ३८ वर्षीया महिलामाथि बोक्सीको आरोप लगाउँदै कुटपिट गरेकी हुन् ।

पीडित पक्ष बिहीबार बिहान घटनाको भिडियोसहित प्रहरी कार्यालय पुगेकी थिइन् । पीडित पक्षले किटानी जाहेरी दिएपछि प्रहरीले कुटपिटमा संलग्न धनहीरालाई नियन्त्रणमा लिएको छ ।

आफ्नो शरीरमा धामी उत्रिएको भन्दै उनी थाल बजाएर मंगलबार साँझबाट चिन्ता बसेकी थिइन् । त्यही चिन्ता हेर्न आएकी छिमेकी महिलालाई धनहीराले बुधबार बिहान साढे चार बजेतिर बोक्सीको आरोप लगाउँदै कुटपिट गरेको प्रहरीले जनाएको छ ।

धामी बस्दा प्रयोग गरेको त्रिसूलले उनीमाथि प्रहार भउको थियो । त्रिसूल प्रहारबाट महिलाको पेट, हात, काँध, पाखुरालगायत शरीरका विभिन्न भागमा चोट लागेको र चोट लागेको ठाउँबाट धेरै रगत बगेको प्रहरीले जनाएको छ ।

कुटपिटबाट घाइते भएर उठ्न नसक्ने बनेकी पीडित बुधबार दिनभर ओछ्यान परेकी थिइन् । चिन्ता बसेको ठाउँमा आएर जथाभावी गरेको र बोक्सीको तन्त्रमन्त्र गर्दैै धामीविद्यामा असर पु¥याएको भन्दै आफूलाई धनहीराले कुटपिट गरेको पीडितले बताएकी छन् ।

पीडित महिलाका श्रीमान अर्को बिहे गरेर तीन वर्षदेखि झापाको सुरुङ्गामा बस्दै आएको खुलेको छ । घरमा देवरका ८ वर्षीय छोरासहित पीडित मात्रै बस्दै आएकी थिइन् । घटना थाहा पाएपछि श्रीमान आएर उनलाई उपचारका लागि लगेका थिए ।

कुटपिट गर्ने महिलाविरुद्ध बोक्सी आरोपको कसुरमा कारबाही अघि बढाउन अनुसन्धान थालिएको इलाका प्रहरी कार्यालय बेलबारीका प्रहरी निरीक्षक ऋषिराज ढकालले बताए ।