बुटवल, १९ असोज । अन्य कुनै कारणवश बैठक स्थगित भएमा र कार्यसुचीबाट हटेन भने सम्भवतः आजै प्रदेश ५ ले स्थायी राजधानी र नाम पाउनेछ तर त्यो सम्भावना न्यून देखिन्छ ।

प्रदेश सभा भवनभित्र यतिबेला प्रदेश ५ को स्थायी राजधानी र नामाकरण को प्रस्तावमा सहमति कायम गर्न सर्वदलिय बैठक चलिरहेको छ । नेकपा संसदीय दलको बैठकमा नेकपा सांसदहरु उपस्थित नभएपछि सर्वदलीय बैठक बसेको हो । नेपाली कांग्रेस, राष्ट्रिय जनमोर्चा, नेकपा, जनता समाजवादी पार्टीका सचेतक, दलका नेता, प्रमुख सचेतकहरु बैठकमा सहभागी भएका छन् ।  यता बाहिर चर्को नाराबाजी चलिरहेको छ ।

प्रदेश सभा भवन छिर्ने मुख्य बाटो सिन्दुर होटलको अगाडिको प्रवेशद्वारमा सडकमा कालो ब्यानर राखेर प्रदर्शनकारीहरू बसेका छन् । नेपाली काङ्ग्रेस, व्यावसायिक प्रतिष्ठानहरुको संजाल, बुटवल नगरपालिकाका बासिन्दाहरुसहित स्वतस्फूर्त रुपमा आन्दोलनमा सरिक भएर बसेका छ्न् । आन्दोलनमा गुल्मी, पाल्पा, भैरहवा लगायतका ठाउँबाट पनि जनसागर आउने बताईएको छ ।

आन्दोलनमा रुपन्देहीस्थित स्थानीय तहहरु तिलोत्तमा नगरपालिका, सैनामैना नगरपालिका, देवदह नगरपालिका सहित सबै स्थानीय तहहरुले आन्दोलनलाई समर्थन गरेका छन भने विभिन्न व्यबसायिक तथा अन्य सामाजिक संस्थाहरुले पनि आन्दोलनप्रती एक्यवद्धता जनाएका छन । यता आन्दोलनकै बिचमा प्रदेश ५ का सांसद भोजप्रसाद श्रेष्ठले प्रदेश सभा संचालन नियमावली संशाेधन मस्यौदा समितिको संयोजक पदबाट राजीनामा दिएका छन् ।

प्रदेश सरकारको निर्णयप्रति असन्तुष्टि जनाउँदै उनले संयोजक पदबाट राजीनामा दिएका हुन् । उनी बुटवलकै सांसद हुन् । नेकपाले भालुवाङका पक्षमा मतदान गर्न ह्विप जारी गरेको छ, मध्यान्ह १२ बजेपछि प्रदेश सभा बैठकको आह्वान गरेको छ ।