उद्योग वाणिज्य सङ्घको जिल्ला अधिवेशनको निर्वाचनपछि मतगणना गर्ने स्थलमा प्रहरी र सर्वसाधरणबिच ०७७ पुस २५ गते साँझ झडपहुँदा प्रहरी इन्स्पेक्टर सहित ३ जना घाइते भएका छन ।

घाइते हुनेमा प्रहरी इन्स्पेक्टर २८ वर्षीय ओमबहादुर पुन, प्रहरी हवल्दार ३८ वर्षीय प्रेमबहादुर थापा र बेसीशहर नगरपालिका–८ का ४१ बर्षीय शंकर न्यौपाने रहेका छन् ।

मतगणना स्थलबाट घटनामा संलग्न बेसीशहर नगरपालिका–८ का ३९ वर्षीय सुरेश श्रेष्ठ र सुन्दरबजार नगरपालिका–८ का २९ वर्षीय सुरज श्रेष्ठलाई प्रहरीले गिरफ्तार गरेको जिल्ला प्रहरी कार्यालय लमजुङका डिएसपी गङ्गाबहादुर थापाले बताउनुभयो ।

घाइते मध्ये न्यौपानेको नाकमा गम्भीर चोट लागेको कारण जिल्ला अस्पताल लमजुङको सिफारिसमा काठमाडौं पठाइएको अस्पतालका प्रमुख हेमन्त श्रेष्ठले बताउनुभयो ।

झडपमा प्रहरी इन्स्पेक्टर पुनको निधारमा सामान्यचोट लागेको छ भने प्रहरी हवल्दार थापाको टाउँकोमा सात ओटा टाँका लगाइ थप उपचारपछि घर गएको डिएसपी थापाले इन्सेक प्रतिनिधिलाई बताउनुभयो ।

उहाँले घटनाको आवश्यक अनुसन्धान गरी कानुनी प्रकिृया अघि बढाइने जानकारी दिनुभयो ।

दलबहादुर मजाकोटी