सप्तरी । ०७१ साउन ६ गते
पंसेरा गाविस-५ की २५ वर्षीया नगीना साहको हत्याको आरोपमा पति ३० वर्षीय शत्रुघ्नप्रसाद साह सोनार र सासु ५२ वर्षीया सुमित्रादेवी साहलाई अदालतले साउन ६ गते पुर्पक्षका लागि थुनामा राख्ने आदेश गरेको छ ।
जिल्ला न्यायाधीश कमलप्रसाद पोखरेलको आदेशले हत्या आरोपमा आरोपितहरूलाई पुर्पक्षका लागि थुनामा राख्ने आदेश भएबमोजिम राजविराज कारागारमा थुनामा पठाइएको स्रेस्तदेार नवराज दुलालले जानकारी दिए ।
घाँटी र शरीरको विभिन्न भागमा चोटपटकको नीलडाम लागेको अवस्थामा पीडितको लाश असार ८ गते विहान घरमा फेला परेको थियो । पीडित र आरोपितबीच केही दिनयता बारम्बार झगडा हुने गरेको र असार ७ गते राति पुनः कुटपिट भएपछि घरबाट चोकतिर भागेकी पीडितलाई समातेर आरोपितहरूले घरभित्र लगी घाँटी थिचेर हत्या गरेको गाउँलेले बताएका थिए ।
लाशको लहानस्थित रामकुमार उमाप्रसाद स्मारक अस्पतालमा असार ८ गते पोष्टमार्टम भएको थियो । हत्याको आरोपमा आरोपितहरूलाई प्रहरीले अनुसन्धानका लागि असार ८ गते घरबाट गिरफ्तार गरेको थियो ।
पीडितका बुवा धनुषा जनकपुर नपा-१० का बिमलकिशोर साहले इलाका प्रहरी कार्यालय कल्याणपुरमा आरोपितहरूविरुद्ध असार १० गते दिएको उजुरी असार ११ गते दर्ता भएको थियो । सामाजिक परम्पराअनुसार पीडितको आरोपित शत्रुघ्नसँग ०७० असार १५ गते विवाह भएको थियो ।
मनोहरकुमार पोखरेल