मकवानपुरको बागमती गाउँपालिका–८ शान्तिपुरमा पानी भरेको खाल्डोमा डुबेर स्थानीय १० वर्षीय बालकको ज्यान गएको छ । शान्तिपुर निवासी लोक बहादुर सारुको छोरा १० वर्षीय सागर सारुको डुबेर मंगलबार दिउँसो मृत्यु भएको हो ।

आफ्नै घरबाट करिब ५ सय मिटर टाढा कालिका कन्ट्रक्सनले भाडामा लिएको जग्गामा खनेको खाल्डोमा रहेको पानीमा पौडी खेल्ने क्रममा डुबेर सागर बेहोस भएका थिए । उनको बेतिनि स्वस्थ्य चौकी फापरबारीमा उपचारको क्रममा मृत्यु भएको हो । सोही विषयलाई लिएर मृतकका आफन्तहरुले कन्ट्रक्सनको कम्पाउण्डभित्र राखिएको बा १८ च ५९३७ नम्बरको बलेरोमा आगजनी गर्दा बलेरो पूर्णरुपमा जलेर नष्ट भएको छ । साथै उनीहरुले बा २ क ५८२० नम्बरको जेसिबी, ना १ क ४४५० तथा ना १ क ४५६५ नम्बरको मिक्चर ट्रक र सोही कन्ट्रक्सनको कार्यालय कक्षको झ्यालको शिशा समेत तोडफोड गरेका छन् ।