अपहरणमा परेका बुढानिलकण्ठ नगरपालिका–१३ कपन बस्ने भारतको बिहार घर भएका ४ वर्षीय पियुष शर्मालाई प्रहरीले असोज १२ गते भारतको बिहारबाट सकुशल उद्धार गरेको छ ।

पीडित बालकका बुबा विनोद शर्माले छोराको अपहरण भएको भन्दै ०७८ असोज ११ गते महानगरीय प्रहरी परिसर बुढानिलकण्ठमा उजुरी दिनुभएको थियो ।

महानगरीय अपराध महाशाखाका एसएसपी चन्द्रकुवेर खापुङले बालक अपहरण गरेको थाहा पाउने बित्तिकै परिवारले दिएको सूचनाको आधारमा नेपाल–भारत सीमा क्षेत्र र भारतको बिहारसम्म खोजी गरी बालकलाई प्रहरीले ०७८ असोज १२ गतेसाँझ भारतको बिहारबाट सकुशल उद्धार गर्न सफल भएको बताउनुभयो ।

अपहरणमा संलग्न भारतको आरोपमा प्रहरीले सोही दिन बिहार घर भई कपन बस्ने ३० वर्षीय शंकर दासलाई पनि गिरफ्तार गरेको छ ।

एसएसपी खापुङका अनुसार पीडित बालकका बुबा बिनोदसँगै कपनमा सिसाको काम गर्ने दासले सुरुमा बालकलाई सार्वजनिक बसमा चढाएर चाबहिलको गोपीकृष्णसम्म पुर्‍याएका थिए । त्यसपछि दासले गौशालाबाट वीरगन्ज जाने बस चढाएर रक्सौल नाका हुँदै बिहार लागेका थिए ।

एसएसपी खापुङले गिरफ्तार परेका व्यक्तिलाई पनि नेपाल ल्याएर थप अनुसन्धान अघि बढाउने बताउनु भयो ।

पाल्पा जिल्लामा रहेर मानव अधिकार अभिलेख र प्रसारको काम गर्दै आउनुभएका यज्ञमुर्ति तिमिल्सिना २०७८ भदौ महिनाको उत्कृष्ट प्रतिनिधि घोषित हुनु भएको छ । उहाँ जिल्लाका समसामयिक मानव अधिकार सवालमा पैरवी गर्न र आर्थिक, सामिजक तथा सांस्कृतिक अधिकारका विषयमा समाचार लेख्न रुची राख्नु हुन्छ ।