९ कात्तिक, विराटनगर । पारिश्रमिक पाउनुपर्ने माग गर्दै मोरङको कटहरीस्थित युनिभर्सल लेदर उद्योगका मजदुर आन्दोलनमा उत्रिएका छन् । कटहरी गाउँपालिका–४ मा रहेको लेदर उद्योग तीन वर्षयता बन्द थियो । बन्द रहेको उद्योग पुनः सञ्चालनमा आउने भएपछि पारिश्रमिक नपाएका स्थायी कर्मचारीले आन्दोलन शुरु गरेका हुन् ।
उद्योग बन्द भएपछि आफूहरुले सञ्चय कोष र उपदानको रकम नपाएपछि आन्दोलन गर्नु परेको उद्योगका मजदुर महम्मद सफल मियाँले बताए । २० वर्षभन्दा बढी उक्त उद्योगमा काम गरेका उनी धनपालथान गाउँपालिका–७ का वडा सदस्य पनि हुन् । उद्योगबाट आफूले करिब सात लाख रुपैयाँ पाउन बाँकी रहेको उनले बताए ।
२०४९ सालबाट उद्योगमा काम गरेका हरिचरण रामले पनि करिब सात लाख रुपैयाँ पाउन बाँकी छ । उद्योगमा मेसिन अपरेटरको रुपमा काम गरेका उनले पारिश्रमिक माग गर्दै आन्दोलनमा उत्रिएको बताए ।
नयाँ व्यवस्थापनले उद्योग सञ्चालन गर्ने तयारी गरेपछि मियाँ र रामसहित ३७ जना मजदुरले उद्योगको गेटमा दैनिक धर्ना दिइरहेका छन् । मजदुरको पारिश्रमिक भुक्तानी नगरी काम शुरु गर्ने तयारी गरेपछि आन्दोलन गरेको नेपाल ट्रेड युनियन कांग्रेस निकट नेपाल कारखाना श्रमिक संघ मोरङका अध्यक्ष श्रीप्रसाद साहले बताए । मजदुरको बाँकी रहेको भुक्तानी दिएपछि मात्रै उद्योग सञ्चालन गर्नुपर्ने उनको भनाइ छ ।
उद्योगका नयाँ व्यवस्थापक मोहम्मद अख्तरले आन्दोलनरत पक्ष श्रम कार्यालयमा जानुपर्ने बताए । पुरानो दायित्वका विषयमा आफू जिम्मेवार नहुने भन्दै उनले उद्योग बैंक मार्फत उद्योगको संरचना र जमिन लिलाम गरेको बताए । ‘आन्दोलनरत मजदुर श्रम कार्यालय जानुपर्छ,’ उनले भने,‘ मजदुरको भुक्तानी कसले दिने भन्ने निर्णय श्रम कार्यालयले गर्नुपर्छ ।’
