आसन्न स्थानीय तह निर्वाचनमा महिलाको संविधानप्रदत हक जालझेजपूर्ण तरिकाले खोसिएको भन्दै महिला नेताहरुले वीरगन्जमा शनिबार विरोध प्रदर्शन गरेका छन्। वीरगन्ज महानगरपालिमा सत्तारुढ गठबन्धन र नेकपा एमाले नेतृत्वको तालमेलले स्थानीय तह प्रमुख वा उपप्रमुखमध्ये एक जना अनिवार्य महिला नै हुनुपर्ने स्थापीत अभ्यासलाई विस्थापित गरेर भाग खोस्ने काम भएको प्रदर्शनका सहभागी महिलाले बताए। आरक्षित वडा सदस्य पद बाहेक स्थानीय तहको निर्वाचनमा महिलालाई कुनै पनि पदमा उम्मेदवार नबनाइएको भन्दै वीरगन्जमा विरोध प्रदर्शन भएको हो।
बिभिन्न राजनीतिक दलमा आबद्ध महिला नेता तथा र कार्यकर्ताहरुले वीरगन्जमा शनिबार विरोध जुलुश निकालेरै प्रदर्शन गरे। घण्टाघरबाट सुरु भएको विरोध जुलुश नगरभित्र परिक्रमापछि पुनः घण्टाघर चोकमैं आएर कोणसभामा परिणत भएको थियो। प्रदर्शनका सहभागीहरूले 'महिलाको सहभागिता सुनिश्चित गर, गठबन्धनको नाममा संविधान मिच्न पाइँदैन, गठबन्धनको नाममा महिलाको अधिकार खोस्न पाइँदैन' जस्ता नारा लगाएका थिए।