चिशंखुगढी गाउँपालिका–४ की ३४ वर्षीया लाक्पा पुटी शेर्पालाई कुटपिट गरी हत्या गरेको आरोपमा प्रहरीले ४० वर्षीय पति प्रेम नुरी शेर्पालाई साउन १० गते गिरफ्तार गरेको छ ।घरायसी विवादका क्रममा आरोपितले साउन ७ गते मरणासन्न हुने गरी कुटपिट गरेको र पत्नी बारीबाट फर्कने क्रममा भिरबाट लडी घाइते भएको भनि ओखलढुङ्गा सामुदायिक अस्पताल सोब्रुमा ल्याइ उपचार गराउने क्रममा साउन ९ गते मृत्यु भएको जिल्ला प्रहरी कार्यालयका डिएसपी सुकदेव खनालले बताउनु भयो ।

प्रहरी समक्ष बयानमा आरोपित शेर्पाले घरायसी विवादका क्रममा आफूले आवेगमा आएर पत्नीलाई लात्ती, मुड्की, काठको दाबिलोले पेट, टाउको र शरीरको विभिन्न भागमा कुटपिट गर्दा घाइते भएको र पछि उपचारको क्रममा ज्यान गएको स्वीकार गरेको प्रहरीले जनाएको छ ।कुटपिट गरी हत्या गरेको आरोपमा माइती पक्षले साउन १० गते जिल्ला प्रहरी कार्यालयमा उजुरी दिएपछि आरोपितलाई साउन १० गते घरबाटै गिरफ्तार गरेको प्रहरीले जनाएको छ ।शवको पोष्टमार्टम जिल्ला अस्पतालमा साउन ९ गते गरिएको छ । पीडित पक्षले साउन १० गते शव बुझी चिशंखुगढी गाउँपालिका–४ मा लामा संस्कार अनुसार सद्गत गरेको छ ।