रौतहट । रौतहटको चन्द्रपुरमा ७७ वर्षीय वृद्धलाई २३ वर्षीय युवाले कुटपिट गरेका छन् । चन्द्रपुर नगरपालिका वडा नम्बर ४ निवासी वृद्ध रामगोपाल घिमिरेलाई वडा नम्बर ५ का अजय चौधरीले कुटपिट गरेका हुन् ।

पिडित घिमिरेका अनुसार शनिबार साँझ एक्कासी चौधरीले लठ्ठी तथा मुड्कीले अन्धाधुन्ध कुटपिट गरेका हुन् । कुटपिट पछि घाइते भएका घिमिरेलाई स्थानियले उद्धार गरेर चन्द्रपुर ४ मा रहेको सिभिल अस्पताल प्रा.लि.मा उपचारको लागि लगेका थिए । अस्पतालका अनुसार उनको ढाड, कम्मर , तिघ्रा, खुट्टा, हात तथा अनुहारमा देखिने गरी चोटपटक लागेको छ ।

कुटाइका कारण घिमिरेमा शरीरका विभिन्न भागहरुमा सुम्लासहितको निलडाम बसेको छ । उनलाई थप उपचार तथा परिक्षणको लागि सुविधासम्पन्न अस्पतालमा लैजाने अवस्था भएपनि आफुहरुसँग खर्चको अभाव भएकाले लान नसकिएको घिमिरेका आफन्तको भनाइ छ ।

चौधरीले आफूलाई पूरानो रिसइबी राखेर कुटपिट गरेको पीडितको भनाइ छ । पीडितका अनुसार पैनीमा पर्खाल बनाउने बेलाको पुरानो रिसीवीको कारण आक्रमण भएको छ ।